Умард Солонгос улс тэнгисийн цэргийн хүчнээ бэхжүүлэх хөтөлбөрийн хүрээнд “тактикийн цөмийн цохилт өгөх чадалтай анхны шумбагч онгоц” үзүүлсэн тухай тус улсын төрийн мэдлийн “KCNA” агентлаг баасан гарагт мэдээлэв.
Умард Солонгосын удирдагч Ким Жөн Ун лхагва гарагт болсон шумбагч онгоцыг үзүүлэх ёслолд оролцсон байна. Тэрбээр ёслолын үеэр хэлсэн үгэндээ “Усан дорх болон газар дээрх цэргийн хүчний орчин үеийн шинэлэг байдлыг тасралтгүй сайжруулах, ирээдүйд Тэнгисийн цэргийн хүчний цөмийн зэвсэглэлийг сайжруулах стратеги, тактикийн төлөвлөгөөг” онцлон тэмдэглэжээ. Пүрэв гарагт Ким Жөн Ун шумбагч онгоцыг туршилтын аялалд бэлтгэж байх үед нь шалгасан байна.
841 дугаартай шумбагч онгоцыг Умард Солонгосын баатар Ким Кун Окийн нэрээр нэрлэжээ. Ким Жөн Уны хэлснээр, уг шумбагч онгоц нь Умард Солонгосын “Тэнгисийн цэргийн хүчний усан дорх довтолгооны үндсэн хэрэгслийн нэг”-ийн хувиар байлдааны үүрэг гүйцэтгэх ажээ.
Шумбагч онгоцыг Солонгосын хойг болон Японы хоорондох усан орон зайд эргүүл хийх флотын зэвсэглэлд шилжүүлэх бололтой.
Шинэ шумбагч онгоцыг ямар пуужингаар зэвсэглэх нь тодорхойгүй байна. Умард Солонгос хэд хэдэн алсын тусгалтай, шумбагч онгоцноос харвах баллистик пуужин, мөн шумбагч онгоцноос харвах боломжтой ойрын тусгалт баллистик пуужин болон далавчит пуужинг туршиж байв. Тус улс шумбагч онгоцны томоохон флоттой боловч одоогоор зөвхөн баллистик пуужин тээх чадалтай “8.24 Yongung” /8-р сарын 24-ний Баатар хэмээх нэртэй/ шумбагч онгоцноос пуужин харвах туршилт хийсэн юм гэж МОНЦАМЭ мэдээллээ.
