Монгол Улсад Үндэсний геологийн салбар үүсэж хөгжсөний 83 жилийн түүхэн ойг тохиолдуулан геологи хайгуулын салбарт хөдөлмөр бүтээл, хөлс хүчээ харамгүй зориулан, энэ салбарын түүхийг бүтээлцсэн үе үеийн геологичид, инженер техникийн ажилтнууд, ахмад буурлууд, эрдэмтэн судлаачид, салбарын нийт ажилтан, ажиллагсад Та бүхэнд Монголын Геологийн Холбоодын Нэгдсэн Зөвлөлийн нэрийн өмнөөс болон хувиасаа чин сэтгэлийн баяр хүргэж, мэндчилгээ дэвшүүлье.
Та бүхэн мэргэжлийнхээ эрхэм зорилгоо дээдлэн биелүүлж эх орныхоо нутаг дэвсгэрийн геологийн зүй тогтлуудыг судлан, шинжилж танин мэдэхийн зэрэгцээ нийгэм, эдийн засгийн тогтвортой өсөлтийг найдвартай хангахад чухал ач холбогдолтой эрдэс баялгийн сан хөмрөгийг арвижуулж ирсэн билээ.
Улс орон, ард түмний эрх ашигт нийцсэн, Монгол орны ойрын болон ирээдүйн хөгжилтэй уялдсан, геологийн салбарт тогтвортой хөгжлийг хангасан хууль эрх зүйн орчныг боловсронгүй болгох, сайжруулах,зохицуулалт хийх шаардлага нь Та бидний өмнө зорилт болон тавигдаж байна.
Энэхүү зорилтыг бодит ажил болгон хэрэгжүүлэхэд салбарын хамт олны шинэлэг санал, санаачлага,бүтээлч хөдөлмөр голлох үүрэгтэй бөгөөд эрдэс баялгийн салбарт ажиллагсад Та бүхэн идэвхтэй оролцож хамтран ажиллана гэдэгт найдаж байна.
Монгол орны геологийн салбарын түүхэн хөгжилд өөрсдийн ажил үйлсээрээ хувь нэмрээ оруулж, түүхэнд мөрөө үлдээж, эх орныхоо хөгжилд үнэтэй хувь нэмэр оруулсан алтан үеийн ахмадуудад болон тэдний залгамжлагч залуу үеийн геологичид Та бүхэндээ ажлын амжилт, эрүүл энхийг хүсч, цаашид улам ихийг хийж бүтээх хүсэл эрмэлзлэл, урам зориг дүүрэн байхын өлзийтэй ерөөлийг өргөн дэвшүүлье.
МОНГОЛЫН ГЕОЛОГИЙН ХОЛБООДЫН НЭГДСЭН ЗӨВЛӨЛИЙН ДАРГА Я.БАТ-ИРЭЭДҮЙ
