АНУ-ын Ерөнхийлөгч Жо Байден, БНХАУ-ын дарга Ши Жиньпин нар “ойрын долоо хоногт” утсаар ярина гэж Цагаан ордон лхагва гарагт мэдэгджээ.
АНУ-ын Үндэсний аюулгүй байдлын зөвлөх Жейк Салливан Хятадын Гадаад хэргийн хорооны дарга Ван И-тэй уулзахаар Бээжинд айлчлах үеэр дээрх мэдэгдлийг хийлээ. Хоёр талын мэдээлснээр, ойрын хугацаанд цэргийн удирдагчид ч мөн утсаар ярих ажээ.
Хиймэл оюун ухааны асуудлаарх Америк, Хятадын хоёр дахь шатны хэлэлцээг хийхээр төлөвлөж байна гэж Хятадын тал мэдээлсэн байна. Цагаан ордны мэдэгдэлд дурдсанаар, Ерөнхийлөгчийн олон улсын уур амьсгалын бодлого хариуцсан ахлах зөвлөх Жон Подеста удахгүй Хятадад айлчлах ажээ. Гэхдээ айлчлал хэдийд болох талаар дурдсангүй.
Хоёр улс технологийн хязгаарлалт, Тайвань, Өмнөд Хятадын тэнгис, Украины асуудлаар байр сууриа хадгалж байгааг Ж.Салливаны айлчлалын талаарх албан ёсны мэдэгдэлд дурджээ.
Ж.Байден ирэх 11 дүгээр сард болох Ерөнхийлөгчийн сонгуулиас нэрээ татсан бөгөөд дэд Ерөнхийлөгч Камала Харрист нэр дэвших эрхээ шилжүүлсэн юм. Цагаан ордны мэдэгдэлд Ерөнхийлөгч нарын нэрийг дурдаагүй, харин “удирдагчдын түвшинд дуудлага” хийхээр төлөвлөж байгааг тэмдэглэжээ.
Харин Хятадын талын мэдэгдэлд “хоёр орны төрийн тэргүүн нар” гэсэн ердийн хэллэгийг ашигласан бөгөөд хоёр тал “харилцаа холбооны шинэ үе шат”-ны талаар хэлэлцэж байна гэсэн байна.
Хоёр орны удирдагчид 2023 оны 11 дүгээр сард Калифорни муж улсын Сан-Франциско хотноо дээд хэмжээний уулзалт хийснээсээ хойш энэ оны дөрөвдүгээр сарын эхээр хоёр цаг орчмын турш утсаар ярьсан юм.
Сүүлийн жилүүдэд хурцадмал байдал нэмэгдэж, Ковид-19 цар тахлын улмаас хилийн хязгаарлалт тогтоосон зэрэгтэй холбоотойгоор дэлхийн хамгийн том эдийн засагтай орнуудын өндөр түвшний харилцаа холбоо амаргүй байсан юм.
Мөн АНУ-ын Төлөөлөгчдийн танхимын дарга Нэнси Пелосигийн 2022 оны наймдугаар сард Тайваньд хийсэн айлчлал, 2023 оны хоёрдугаар сард олны анхаарлыг татсан “агаарын бөмбөлгийн асуудал” зэрэг нь хоёр талын харилцааг улам хурцатгаж, урьдчилан төлөвлөөд байсан зарим яриа хэлэлцээг түр зогсооход хүргэжээ.
Ж.Салливан Бээжинд мягмар гарагт хүрэлцэн ирж, Ван И-тэй хоёр өдрийн уулзалт хийсэн юм. Тэрбээр сүүлийн жилүүдэд Ван И-тэй олон удаа уулзаж байсан боловч үндэсний аюулгүй байдлын зөвлөхийн хувиар Хятадад анх удаа айлчилж буй нь энэ юм. Сюзан Райс 2016 онд Обамагийн засаг захиргааны үед Бээжинд айлчилсан нь АНУ-ын Ерөнхийлөгчийн үндэсний аюулгүй байдлын зөвлөхийн Хятадад хийсэн хамгийн сүүлийн албан ёсны айлчлал байв гэж МОНЦАМЭ мэдээллээ.
2 сэтгэгдэл
I like this website very much, Its a very nice spot to read and find information.
I was just looking for this information for some time. After 6 hours of continuous Googleing, finally I got it in your site. I wonder what’s the lack of Google strategy that do not rank this kind of informative web sites in top of the list. Generally the top sites are full of garbage.