ОБЕГ-ын тэргүүн дэд бөгөөд штабын дарга, хурандаа Ц.Ганзориг, УОК-ын нарийн бичгийн дарга, хурандаа Т.Баярхүү нараар ахлуулсан Шуурхай ажлын хэсгийн бүрэлдэхүүн Хэнтий аймгийн Баян-Овоо суманд өнөөдөр ажиллаж байна.
Энэ сарын 09-нд Баян-Овоо сумын Сүмбэр багт гарсан гал түймрийн улмаас нийт 30.800 га газар шатсан бөгөөд урьдчилсан байдлаар 5 айлын 7 гэр, 5 саравч, 4 хашаа, нэг өрхийн 300 гаруй толгой мал өртсөн, хохирлын хэмжээг тогтоохоор ажиллаж байгаа юм.
Монгол Улсын Засгийн газар, УОК-оос гал түймэрт өртсөн айл өрхүүдэд иж бүрэн гэр, дулаан хувцас хэрэглэл, хоол хүнс, эмийн багц бүхий тусламж үзүүлснийг ажлын хэсгийн бүрэлдэхүүн хүлээлгэн өглөө.
Мөн гал түймэрт өртсөн айл өрхийн малчдад СЭМҮТ, ЭМЯ, МЭЕГ-ын холбогдох мэргэжилтнүүд эрүүл мэндийн болон сэтгэлзүйн тусламж зөвлөгөө өгч ажиллаж байна гэж ОБЕГ мэдээллээ.
