Ерөнхийлөгч Х.Баттулга МАН-ыг тараах захирамжаа бататгаж өнөөдөр дахин мэдэгдэл хийлээ. Гэхдээ бүр нийслэлийн төв талбайд гарч ирээд, баяр наадмын нээлт дээр үг хэлж байгаа аятай асуудалд хандав. Төрийн тэргүүний энэхүү үйлдэл нь коронавирусын өвчлөл нэмэгдэж, үхэл өсч байгаа үед цагаа олсонгүй гэж үзэх олон хүн байна.
Тухайлбал, нэрт эмч Б.Болдсайхан “Тахал, үхэл дундуур Файзер вакцин хийлгэсэн том дарга нарын ширээний төлөөх увайгүй тэмцлийн золиосонд вакцинтай вакцингүй иргэд жагсаж бөөгнөрч хэдэн мянгаараа өвдөж, үхэх вий! Даруухан урдах ажлаа хичээн хийж, арав тав хоновол нийтээрээ даваад гарчих гээд байдаг!” хэмээн цахим хуудсандаа дургүйцэн бичсэн байна.
