Нийслэлийн Иргэдийн Төлөөлөгчдийн хурлын 2020 оны ээлжит сонгуульд Хөдөлмөрийн Үндэсний намаас нэр дэвшигчид нийслэлийн Сонгуулийн хорооноос үнэмлэхээ гардан авлаа. Энэ удаагийн сонгуульд Монгол Ардын нам, Ардчилсан нам, МАХН, Монголын ногоон нам, Дэлхийн Монголчуудын нам, Сахигтун! Үндсэн хуулийн 19 эвсэл, Ж.Ганбаатар, Д.Мөнх-Эрдэнэ нарын бие даагчид нэр дэвшиж, үнэмлэхээ гардан авсан юм. Нийслэлийн Сонгуулийн хорооны дарга Ү.Ганболд “Монгол Улсын аймаг, нийслэл, сум, дүүргийн ИТХ-ын сонгуулийн тухай хуулинд заасны дагуу нийслэлийн Иргэдийн Төлөөлөгчдийн хурлын 2020 оны сонгуульд оролцохоор улс төрийн нам, эвслүүд болон бие даагчид нийслэлийн Сонгуулийн хороонд бүртгэгдсэн. Есдүгээр сарын 29-нд Захиргааны хэргийн анхан шатны шүүхийн шүүгчийн захирамжаар нийслэлийн ИТХ-ын 2020 оны ээлжит сонгуульд оролцох Хөдөлмөрийн Үндэсний намын нэр дэвшигчдийг бүртгэсэн тогтоолын үйлчлэлийг түтгэлзүүлсэн. Нийслэлийн Сонгуулийн хороо Монгол Улсын хүчин төгөлдөр мөрдөгдөж байгаа хууль тогтоомжийн дагуу ХҮН-ын нэр дэвшигчдийн үнэмлэхийг гардуулах боломжгүй болсон. Өчигдөр буюу аравдугаар сарын 5-нд нийслэлийн Захиргааны хэргийн шүүхэд урьдчилсан хэлэлцүүлэг дахин явагдаж, Захиргааны хэргийн шүүхийн шүүгчийн 2020 оны есдүгээр сарын 29-ны өдрийн захирамж хүчингүй болсон. Хүчингүй болсоноор нийслэлийн Сонгуулийн хорооны 2020 оны есдүгээр сарын 16-ны өдрийн 21 дүгээр тогтоол буюу ХҮН-ын нэр дэвшигчдийг НИТХ-ын сонгуульд нэр дэвшигчээр бүртгэсэн тогтоолын үйлчлэл эргэн сэргэж байна. Ингээд өнөөдөр нийслэлийн Сонгуулийн хорооноос ХҮН-ын нэр дэвшигчдэд үнэмлэхийн гардуулж байна. Сонгуулийн сурталчилгааг аравдугаар сарын 13-ны өдрийг дуустал явуулах ёстой. Сонгуулийн хууль болон бусад холбогдох хууль тогтоомжийг удирдлага болгон ажиллахыг хүсч байна. Та бүхэн сонгуулийн үйл ажиллагаанд амжилт хүсье” хэмээлээ гэж Нийслэлийн Засаг даргын тамгын газрын Хэвлэл мэдээлэлтэй харилцах хэлтсээс мэдээллээ.
