Богд Зонховын хөшөөнд 32 тэрбум төгрөг зарцуулахаар болжээ гэдэг мэдээлэл сошиалыг хэдэн өдөр “нервтрүүллээ”. Зарим хүмүүс амралтын хоёр өдөр ёстой л амаа ангаж цангатал хараал ерөөл урсгав. Харин өнөөдөр Соёлын сайд Ч.Номин цахим хуудсаараа дамжуулан уг хөшөөнд олон тэрбум төгрөг зарцуулахгүй болсныг мэдэгдлээ. Тэрбээр “Түүх, шашны соёлыг дэлгэрүүлэх Богд Зонхова цогцолборын төсөл намайг Соёлын сайдаар томилогдохоос өмнө эхэлсэн төсөл юм. Анх Соёлын яам энэ цогцолборыг барих, эхлүүлэх санаачилга гаргаагүй, өнгөрсөн хугацаанд энэ төсөлд нэг ч төгрөг зарцуулаагүй болно. Энэ хөрөнгө оруулалтыг цаг үеэ олоогүй гэж үзэж байгаа учраас Соёлын сайдын хувьд “Богд зонхова” цогцолборын төсөлд хөрөнгө зарцуулахгүй болохоо үүгээр мэдэгдэж байна.Монгол Улсын хувьд түүх, соёл, шашин нь бидний оршин тогтнохтой холбоотой асуудал. Гэвч, аль ч шашинд сүсэглэх, шүтэх нь аливаа цогцолборыг барих, болихоос үл шалтгаалах дотоод итгэл үнэмшлийн асуудал тул эвийг эрхэмлэхийг Та бүхнээс хичээнгүйлэн хүсье” хэмээн мэдэгдлээ.
Холбоотой Нийтлэлүүд
